वटवाघळाची आरती
वटवाघळाची आरती
~अनिता म. कांत
जय देव जय देव, वटवाघुळ देवा
आलो तुमच्या दारी, आश्रय मज द्यावा IIधृII
उतलो मातलो केला विध्वंस
प्राणी जगताचा पुरता र्हास
हाय सर्वांची लागे मानवा II १II
आलो तुमच्या दारी, आश्रय मज द्यावा; वटवाघुळ देवा IIधृII
तोडली वने, लुटले खग
प्रदूषणाने नासले जग
प्रगतीचा परी केला कांगावा II२II
आलो तुमच्या दारी, आश्रय मज द्यावा; वटवाघुळ देवा IIधृII
धाडीला विषाणू केले क्रंदन
सर्वत्र मृत्यूचे माजे थैमान
कोप भयंकर कैसा विझवावा II३II
आलो तुमच्या दारी, आश्रय मज द्यावा; वटवाघुळ देवा IIधृII
भल्याभल्यानी हात टेकले
बाबा-नेते-वैदू पळून गेले
उपाय सत्वर काही सांगावा II४II
आलो तुमच्या दारी, आश्रय मज द्यावा; वटवाघुळ देवा IIधृII
आरसा पाहुनी येई तरस
माणूस नव्हे दिसे राक्षस
जाहला उशीर होता पस्तावा II५II
आलो तुमच्या दारी, आश्रय मज द्यावा; वटवाघुळ देवा IIधृII
काय उत्क्रांती काय उद्धार
नरापरता बरा वानर
डार्विन स्वये करितो धावा II६II
आलो तुमच्या दारी, आश्रय मज द्यावा; वटवाघुळ देवा IIधृII
घरात कैदी झालो दुर्बळ
जाणवे अपुल्या कर्माचे फळ
दोष दूजास कशास द्यावा II७II
आलो तुमच्या दारी, आश्रय मज द्यावा; वटवाघुळ देवा IIधृII
चंगळ-वादी बनून हाय
एक दुजाचे ओढतो पाय
चराचराचाही तोल ढळावा II८II
आलो तुमच्या दारी, आश्रय मज द्यावा; वटवाघुळ देवा IIधृII
नको नको जीव घेणारी स्पर्धा
होरपळे प्राण राहिला अर्धा
थांबू जरा घेऊ थोडा विसावा II९II
आलो तुमच्या दारी, आश्रय मज द्यावा; वटवाघुळ देवा IIधृII
द्यावी सुबुद्धी द्यावा प्रकाश
करा मोकळे आता आकाश
विचार सुदृढ मनी जागवा II१०II
आलो तुमच्या दारी, आश्रय मज द्यावा; वटवाघुळ देवा IIधृII
Comments
Post a Comment